Sorgardúfa-Morgundúfa

Fyrir utan baðherbergisgluggann minn býr fugl sem hefur gert sér hreiður á grein svo nálægt glugganum að ég er á fyrsta bekk og er hálf verklaus af spenningi vegna væntanlegrar fæðingar. Ég vissi ekkert hvaða tegund þetta var svo að ég reyndi að lýsa honum fyrir nágrannakonu minni sem er dýraatferlisfræðingur sem kom síðan í heimsókn og tjáði mér að þetta væri Morning dove. Ég er nú svo illa að mér að ég hélt að hún ætti við að dúfan væri Morgundúfa kannski af því hvað ég er jákvæð þessa dagana en reyndin er víst að þetta er Sorgardúfa. Sumsé Mourning dove.
Það gerir hana ennþá meira spennandi að hún skuli bera svo dramatískt nafn. Ég hef sérlegan aðgang að miklum fuglaskoðanda á Íslandi sem sagði mér að Sorgardúfur eru einhver algengasta og útbreiddasta dúfnategund í N-Ameríku. Ég er hæstánægð að hún skuli heiðra okkur með návist sinni.
Ég bíð spennt eftir að fá að líta ungana hennar augum og skal leyfa ykkur að fylgjast með.

Athugasemdir

[Halldór Egill Guðnason, 22.8.2007 kl. 15:54]

Já það er ekki sama hvort maður segir "good morning" eða "good mourning". Sennilega ekkert mjög vinsælt þetta síðara.Þú verður farin að galdra dúfur upp úr hatti með haustinu.

[Ásta Björk Solis, 22.8.2007 kl. 18:01]

Thegar eg var hja vinkonu minni i Louisiana helt eg ad eg vaeri ad heira i Uglu en thad passadi ekki thvi thad var um midjan dag.Hun sagdist sjalf hafa haldid thad sama en nagranni hennar sagdi thettad vera Mourning Dove.Eg hef nokkrum sinnum tekid eftir thessu sama hljodi her hja mer.Njottu vel.

[Bjarni Thor Kristinsson, 22.8.2007 kl. 22:03]

Þetta minnir mig á dúfurnar sem ég ræktaði sem ungur drengur suður með sjó. Þetta voru hálfgerðar skræpur en mér þótti samt voðalega vænt um þær. Einn daginn komst minkur í kofann minn og slátraði öllum dúfnahópnum (4 dúfur) en skyldi tvo nýútskriðna dúfuunga eftir. Í sorg minni leitaði ég huggunar í nýja "móðurhlutverkinu", tók ungana með mér inn í hús og setti þá í kassa á hlýjum stað. Síðan keypti ég barnamat og gaf þeim með sprautu. Svo fengu þeir líka að drekka, mikið að drekka enda voru þeir alltaf svo hungraðir og þyrstir sýndist mér. Á endanum dóu þeir úr ofdrykkju/áti, feitir og hamingjusamir (vonandi).

Ef þú lendir af einhverjum ástæðum líka í móðurdúfuhlutverkinu þá skaltu ekki gera sömu mistök og ég.

[Garún, 22.8.2007 kl. 22:43]

Það er svo gaman að fylgjast með dýrum.  Ég er dáleidd þessa dagana, þar sem fiskurinn okkar eignaðist 5 seiði sem eru að stækka og leika sér.  Ég kíki oft á dag til að fylgjast með þeim..

[Jórunn Sigurbergsdóttir , 23.8.2007 kl. 17:34]

Gaman af þessu.